ចេះកាន់កាមេរ៉ាថតរូបដំបូងៗរៀងមានអំនួតបន្តិច
និងមានទម្លាប់មិនល្អមួយចំនួនដែលនាំឲ្យខូចការជាញឹកញយ។
ប៉ុន្តែបទពិសោធន៍ច្រើនដងទៅ
វាអាចនាំឲ្យអ្នកកែប្រែកំហុសទាំងនោះចេញជាមិនខាន។
ខាងក្រោមនេះ គឺជាទម្លាប់អាក្រក់ទាំង ១០ នៃអ្នកថតរូបថ្មីថ្មោងមួយចំនួនតែងពើបប្រទះ៖
១)
ប្រើឧបករណ៍មិនត្រឹមត្រូវ
ទើបចេះកាន់កាមេរ៉ាថ្មីថ្មោង
អ្នកខ្លះចំណាយលុយទិញកាមេរ៉ាថ្លៃផុតលេខ។
មានកាមេរ៉ាភ្ជាប់ជាមួយ Sensor កម្រិត Resolution ខ្ពស់
និងមុខងារល្អៗ គឺជាការល្អប្រសើរ
តែភ្លេចគិតដល់ Lens ។
Lens ក៏ជារបស់សំខាន់មួយ
ដែលជួយបង្កើនគុណភាពរូបផងដែរ។
ដូច្នេះអ្នកគួរទុកថវិកាខ្លះសម្រាប់ Lens ។
គួរបែងចែកលុយកាក់
ឲ្យមានតុល្យភាពក្នុងការទិញឧបករណ៍។
ទិញកាមេរ៉ាល្អ
តែគួរមាន Lens ល្អផងដែរ។ Lens
24-70mm f/2.8 ឬ 70-200mm
f/2.8 មិនថោកទេ
តែបើមានគឺជាការល្អ
។
២)
មើលរំលងរឿងកំប៉ិកកំប៉ុក
ជូនកាលប្រហែស
អាងថាថ្មថាមពលកាន់ភ្លើងបានយូរ
មិនខ្វាយខ្វល់រឿងសាកឲ្យបានពេញៗ
ហើយមិនបានត្រៀមថ្មទុកផ្លាស់ប្ដូរទៀត។
ដល់ពេលចេញថតបានពាក់កណ្ដាលទី
អស់រលីង តើត្រូវធ្វើម៉េច?
មានតែឈប់ថត
ហើយត្រលប់មកសាកថ្មឲ្យពេញវិញ។
រឿងមួយទៀតគឺ
អង្គចងចាំ (Memory
Card) ។
ជាញឹកញយអ្នកថតតែងមើលងាយសមត្ថភាពអង្គចងចាំ
ឬមើលងាយការងាររបស់ខ្លួន
ពេលចេញថតខាងក្រៅ
ឬក៏ដោយសារការខ្ជិលមិនទាញរូបភាពទុកក្នុងកុំព្យូទ័រឲ្យហើយ។
ពេលចេញថត ជួនកាលចង់ថតវីដេអូខ្លះ
ថតរូបភាពខ្លះ
ស្រាប់តែអង្គចងចាំគាំងលែងដំណើរការ
ព្រោះអ្នកជ្រើសយកអង្គចងចាំដែលមាន Speed ទាបមកប្រើ Processing មិនសមាមាត្រ
និង Resolution ដែល Sensor ផ្ដល់ឲ្យ។
ពេលខ្លះថតពេញអង្គចងចាំ
ខណៈដែលអ្នកមានអង្គចងចាំតែមួយគត់។
នេះបានចំជាប្រហែស!
គ្មាននរណាម្នាក់ចង់ឲ្យកាមេរ៉ាអស់ថ្ម
ឬ Storage ពេញ
ពាក់កណ្ដាលទីកំពុងថតរូបនោះទេ។
សូម្បីតែថ្មប្រើលើ DSLR អាយុវែង
ក៏មានមួយ
ឬពីរទុកសាគួរជាការចាំបាច់។
បច្ចុប្បន្ននេះម៉ាស៊ីនថតទំនើបៗតែមានរន្ធអង្គចងចាំដល់ទៅ២។
ដាក់ទាំងពីររន្ធ
ហើយត្រូវជ្រើសយកអង្គចងចាំដែលល្អមកប្រើ។
ពេលទិញអ្នកគិតគូរច្រើនរឿងលុយកាក់
តែដល់ពេលប្រើបានដឹងថា
លុយទាំងនោះថ្លៃមិនស្មើរូបភាពដែលអ្នកថតបាន
ឬចង់បានហើយមិនបានថតនោះទេ
៣)
មិនសម្អាតឧបករណ៍ទៀងទាត់
កាមេរ៉ាជាទ្រព្យរបស់អ្នកថតរូប
ត្រូវការថែទាំជាប្រចាំ។
រាល់ពេលប្រើប្រាស់រួច
គួរសម្អាតដោយប្រើក្រណាត់ទន់ៗ។
មានចំណុចមួយ មិនថាប្រយ័ត្នប៉ុណ្ណា
ធូលីដីនៅតែចូលកាមេរ៉ា
ទំលើ Sensor ប៉ះពាល់ដល់គុណភាពរូបភាព។
អាចទិញសម្ភារៈសម្អាត Sensor និងរៀនធ្វើដោយខ្លួនឯង
ឬទៅហាងឲ្យគេសម្អាត
រៀងរាល់ ៦ ខែម្ដង។
៤)
រកទីតាំងមិនបានល្អ
ការថតរូបពឹងទាំងស្រុងលើពន្លឺ
ក៏ប៉ុន្តែមិនមែនថា
ឲ្យតែមានពន្លឺថតស្អាតនោះទេ។
អ្នកត្រូវចេះប្រើពន្លឺទៅតាមពេលវេលាទៀត
ទើបអាចទទួលបានរូបដ៏ស្រស់ស្អាតប្រកបដោយអត្ថន័យ។
ចុះឲ្យធ្វើដូចម្ដេច?
អ្នកថតរូបមិនមែនទេវតាទេ
តែត្រូវដឹងពីទីតាំង
និងពេលវេលា ដែលព្រះអាទិត្យរះ
និងលិចទៅវិញ
ដោយប្រើកម្មវិធីដូចជា PhotoPills ។
វាអាចប្រាប់ពីពេល
និងទីកន្លែង ដែលថ្ងៃនឹងរះឡើង
ឬលិច។ យើងអាចមើលទីតាំង
ដោយប្រើកម្មវិធីដូចជា Google
Maps មើលតាម Street
View mode ទៅលើទីតាំង
ក៏ដូចជាប្លង់ចង់ផ្ដិតយក។
ពិតណាស់ទិន្នន័យក្នុងនោះ
អាចខុសគ្នា ពីការជាក់ស្ដែង
តែក៏ជួយផ្ដល់ជាគំនិតបានខ្លះដែរ។
៥)
តែងថតពីលើ
ដើម្បីបង្ហាញទេសភាពធំទូលាយ
មានពណ៌ចម្រុះ
អ្នកថតភ្លេចគិតពី Subject ហើយថតតែប្លង់ពីលើទីខ្ពស់គ្របទៅលើទិដ្ឋភាពរួម
ដែលធ្វើឲ្យរូបភាពបាត់បង់អត្ថន័យ។
អ្នកគួរតែរកមនុស្ស
ឬក្រុមមនុស្សកំពុងធ្វើសកម្មភាព
រកសត្វ ឬហ្វូងសត្វ
ឬដើមឈើណាមួយធ្វើជាប្រធានបទក្នុងការបង្ហាញទេសភាពដែលមាននៅជុំវិញនោះ។
មួយទៀតអ្នកថតថ្មីថ្មោងអាចប្រព្រឹត្តិកំហុស
ដោយឈរខ្ពស់ជាង Subject ហើយចូលចិត្តដាក់ Subject នៅចំកណ្ដាលប្លង់
សម្រាប់រូប Portrait ។
វាមិនមានលក្ខខ័ណ្ឌកំណត់ដាច់ខាតនោះទេ
តែអ្នកថតត្រូវគិតដែរ
ព្រោះរូបភាពបែបនេះអាចបញ្ជាក់នូវអត្ថន័យមួយផ្សេងទៀតខុសពីការរំពឹងទុក។
បញ្ហានេះអ្នកគួរសិក្សាអំពី Rule
of third និង Camera
angle ដែលបានបកស្រាយក្នុងមេរៀនខាងដើម។
៦)
ចម្លងស្ទិលពីអ្នកថតដទៃ
ស្នាដៃថតរូបនានា
មានលើអ៊ីនធឺណិតរាប់ភ្លេច។
ឃើញគេល្អ មិនប្រាកដថា
ថតដូចគេចេញមកបានស្អាតប្លែកនោះទេ
ប្រហែលពន្លឺអាចខុសគ្នា។
ចម្លងស្នាដៃ
ជាការលើកទឹកចិត្តជំរុញការងារល្អ
តែព្យាយាមធ្វើឲ្យដូចគេ
ជាលទ្ធផលតែម្ដង
ជាកំហុសគួរជៀសវាង។
គួរព្យាយាមបង្កើតស្ទិលផ្ទាល់ខ្លួន
ហើយជំនាញនឹងអភិវឌ្ឍន៍ជាបន្តបន្ទាប់។
៧)
ក្នុងដៃគ្មានកាមេរ៉ា
មិនដឹងប៉ុន្មានដងហើយភ្លេចកាមេរ៉ានៅផ្ទះ
ខណៈជួបទិដ្ឋភាពល្អប្លែកភ្នែក។
ការកាន់កាមេរ៉ានឹងដៃ
អាចចាប់យករូបភាពបានគ្រប់ពេល
ឲ្យតែឱកាសមកដល់
ជាពិសេសទិដ្ឋភាពភ្ជាប់នឹងពន្លឺធម្មជាតិដ៏ល្អ។
ពិតណាស់
មិនងាយស្រួលនោះទេកាន់កាមេរ៉ា DSLR ទៅមកៗ
ដូចនេះ គួរមានកាមេរ៉ាតូចល្មមប្រើ
បើអាច។
៨)
អាងកាត់ត
បច្ចុប្បន្នកាមេរ៉ាជាច្រើន
អាចថតទម្រង់ File
RAW ដែលវាជួយឲ្យកែប្រែបាន
តែក៏មិនគួរពឹងលើការកាត់តច្រើនពេកទេ។
ជាការល្អ
បើយើងកំណត់កម្រិត Exposure ឲ្យបានត្រឹមត្រូវពេលថត
ជាងពឹងលើកម្មវិធីដូចជា Adobe
Lightroom។
ការកែប្រែ Saturation និង Clarify មិនត្រឹមត្រូវ
អាចប៉ះពាល់ដល់គុណភាពរូប។
ត្រូវគិតថា
បើថតរូបបានស្អាតដោយមិនចាំបាច់ Edit គឺជារឿងមួយគួរឲ្យមានមោទនភាពណាស់សម្រាប់អ្នកថតរូប។
៩)
ចង់សម្គាល់ស្នាដៃ
ពេលចែករំលែករូបថត
Watermark ប្រើសម្គាល់ម្ចាស់រូប
មិនចង់ឲ្យនរណាម្នាក់យកទៅប្រើ
ជាជម្រើសផ្ទាល់ខ្លួន
តែតិច ឬច្រើន
អាចរំខានដល់អ្នកមើល
ចំពោះរូបភាពដ៏ស្រស់ស្អាត។
មួយវិញទៀត បើនរណាម្នាក់ចង់យក
អាចតម្រឹម ឬលុបផ្នែកសម្គាល់បាន
មិនពិបាកនោះទេ។
ជាការការពារ
ពេល Upload រូបភាពគួរប្រើទំហំតូច
កុំប្រើទំហំដើម។
១០)
ឆាប់បោះបង់ងាយស្រួលពេក
ពេលខ្លះអ្នកបានរៀបចំគម្រោងការ
សម្ភារៈ ឆាកសម្រាប់ថតជាស្រេច
និងរំពឹងថាថតរូបក្នុងក្ដីស្រមៃ
តែអាកាសធាតុប្រែប្រួលមិនអំណោយផល។
រឿងមួយទៀតអ្នកមិនចូលចិត្តរង់ចាំ។
ដើម្បីបានរូបស្អាត
ត្រូវអត់ធ្មត់រង់ចាំពេលវេលាសមស្របមកដល់
សឹមយើងក្ដោបយកតែម្ដង។
អាកាសធាតុមិនល្អ
គ្មាននរណាម្នាក់អាចដឹងបាននោះទេ
នេះអាចរំខានដល់ដំណើរការ
ឬការរៀបចំដ៏ល្អរបស់អ្នកក្នុងការផលិតរូបភាព។
តែកុំធ្វើឲ្យបញ្ហានេះ
បំបាក់ទឹកចិត្តអ្នក។
សម្របតាមអាកាសធាតុ
ជ្រើសរើសប្លង់ថតតាមការគួរ
ទាំងខាងក្រៅ ឬខាងក្នុង
អាចស-ខ្មៅ, ប្រើ ND
Filter ឬរៀបចំថតលក្ខណៈ Macro ឬ Portrait៕
